.png)
ရန်ကုန်၊ နိုဝင်ဘာ ၃
အစိုးရသစ်၏ ကားသွင်းခွင့် မူဝါဒသစ်တွင် ပါဝင်သော ဘဏ်အပ်ငွေ ဒေါ်လာတစ်သိန်း ရှိသည့် ကုမ္ပဏီများနှင့် ဘဏ်အပ်ငွေ ဒေါ်လာ သုံးသောင်း ရှိသည့် ပြည်ပရောက် မြန်မာအလုပ်သမားများ ယခုလ (နိုဝင်ဘာ) ဒုတိယပတ်အတွင်း ကားသွင်းခွင့် စတင်ရရှိမည် ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန အကြီးတန်း တာဝန်ရှိသူ တစ်ဦးက The Voice Weekly သို့ အတည်ပြု ပြောကြားသည်။
" မကြာခင် ရက်ပိုင်းအတွင်း ကြေညာချက် ထွက်မှာပါ။ အသေးစိတ် အချက်အလက်တွေကို မီဒီယာတွေကို ထုတ်ပြန်ပေးပါ့မယ် " ဟု ၎င်းက ထပ်လောင်း ပြောကြားသည်။
ဘဏ်ထဲတွင် ဒေါ်လာ သုံးသောင်း သွင်းထားသော ပြည်ပရောက် မြန်မာလုပ်သားများနှင့် ဘဏ်ထဲတွင် ဒေါ်လာ တစ်သိန်း သွင်းထားသော ကုမ္ပဏီများ ကားသွင်းခွင့်ကို ယခုလ ဒုတိယပတ်တွင် စတင်ခွင့်ပြုနိုင်ရန် ဆွေးနွေးညှိနှိုင်း ထားပြီးဖြစ်ကာ အသေးစိတ် လုပ်ဆောင်ရန် ရှိနေသည်များကို ဆက်လက်ဆွေးနွေး လုပ်ဆောင်နေရာ ယခုရက်ပိုင်းအတွင်း အပြီးပြတ် ထုတ်ပြန် ကြေညာနိုင်မည် ဖြစ်ကြောင်း ၎င်းက ရှင်းပြသည်။
ပြည်ပရောက် ဘဏ်ထဲတွင် ဒေါ်လာ သုံးသောင်းနှင့် ဒေါ်လာ တစ်သိန်းရှိသော မြန်မာလုပ်သားများနှင့် ကုမ္ပဏီများ ကားသွင်းခွင့် ပြုမည့်အပြင် အခွန်ပေးဆောင်သော နိုင်ငံသားတိုင်း ကားသွင်းခွင့် ရရေး ဆက်လက် လုပ်ဆောင်သွားမည် ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ ဒုတိယဝန်ကြီး ဒေါက်တာ ပွင့်ဆန်းက အောက်တိုဘာလ ၂၆ ရက်နေ့က နေပြည်တော်တွင် ကျင်းပသော မီဒီယာတွေ့ဆုံပွဲ၌ ပြောကြားသည်။
" ပြည်ပရောက် မြန်မာလုပ်သားတွေနဲ့ ကုမ္ပဏီတွေ ကားသွင်းခွင့် ပေးတော့မယ် ဆိုတော့ ကားသောင်းဂဏန်း ထပ်ဝင်လာ နိုင်တယ်။ ဒီတော့ ပြည်တွင်းကားဈေး နိုင်ငံတကာ ပေါက်ဈေးနီးပါး ပြုတ်ကျသွားမယ်။ ဒါ ကြိုဆိုရမှာပါ။ ဒါပေမဲ့ ယာဉ်ကြော ပိတ်ဆို့မှုတွေ မဖြစ်ဖို့ကိုလည်း စဉ်းစားပြီး ကြိုတင်လုပ်ဆောင် သွားသင့်ပါပြီ " ဟု ပို့ကုန် လုပ်ငန်းရှင်ကြီး တစ်ဦးက သုံးသပ်ပြသည်။
ထိုင်ဝမ်၊ စင်ကာပူ၊ ထိုင်းတို့တွင် မြန်မာ ကော်လံဖြူများနှင့် သင်္ဘောသားများ စုစုပေါင်း သုံးသိန်းနီးပါး ရှိပြီး ၎င်းတို့၏ သုံးပုံတစ်ပုံ ကားသွင်းရန် စိတ်ဝင်စားပါက လူတစ်သိန်းခန့် ရှိမည်ဖြစ်ရာ ပြည်တွင်း ကားဈေးကွက်တွင် ကားဈေးနှုန်းများ သေချာပေါက် ကျဆင်းသွားနိုင်ကြောင်း၊ ယင်းအပြင် အဆိုပါ လူတစ်သိန်းက မြန်မာနိုင်ငံသို့ ပို့ထားသောငွေများကို ဟွန်ဒီလွှဲ၍ ဒေါ်လာဝယ်ပြီး မြန်မာနိုင်ငံရှိ ဘဏ်တစ်ခုခုသို့ တရားဝင် ဒေါ်လာအဖြစ် ဒေါ်လာ သုံးသောင်းစီ ထည့်သွင်းလျှင် မြန်မာနိုင်ငံရှိ ဘဏ်များတွင် အမေရိကန် ဒေါ်လာ သုံးဘီလီယံ ရောက်ရှိလာမည် ဖြစ် (သတင်းဖော်ပြပြီး The Voice Weekly Vol.7/ No.40) သည်။
No comments:
Post a Comment