မြန်မာနိုင်ငံတွင် တစ်ရက်လျှင် အမျိုးသမီးနှစ်ဦးခန့် မုဒိမ်းမှု ကျူးလွန်ခံနေရ

ရွှေရည်စောမြင့် | Thursday, 28 November 2013

မြန်မာနိုင်ငံတွင် မုဒိမ်းမှုသည် ဒုတိယဖြစ်ပွားမှု အများဆုံး ရာဇ၀တ်မှုဖြစ်ပြီး တစ်ရက်လျှင်အမျိုးသမီး နှစ်ဦးခန့် မုဒိမ်းမှု ကျုးလွန်ခံနေရကြောင်း မြန်မာနိုင်ငံရဲတပ်ဖွဲ့၏ ထုတ်ပြန်ချက်များကိုကိုးကားပြီး မုဒိမ်းမှု ခုခံကာကွယ်ရေး အသင်း၏ တာဝန်ခံ ဦးသာလွန်ဟိန်း က ရန်ကုန်မြို့  YoungWomen's Christian Association ၌ နိုဝင်ဘာလ ၂၄ ရက်နေ့က ကျင်းပခဲ့သည့် မုဒိမ်းမှုကြိုတင်ကာကွယ်နည်း နှီးနှောဖလှယ်ပွဲတွင် ပြောသည်။

မြန်မာနိုင်ငံ ရဲတပ်ဖွဲ့၏ စာရင်းဇယားများအရ လက်ရှိနိုင်ငံအတွင်း ဖြစ်ပေါ်နေသော ရာဇ၀တ်မှုများအနက် လူသတ်မှုမှာ အများဆုံးဖြစ်ကာ မုဒိမ်းမှုသည် ဒုတိယအဖြစ် အများဆုံး ရာဇ၀တ်မှုဖြစ်သည်ဟု ၎င်းက ဆိုသည်။

၂၀၀၃ မှ ၂၀၁၃ ခုနှစ်အထိ ၁၀ နှစ်အတွင်း တစ်နိုင်ငံလုံးတွင် မုဒိမ်းမှု စုစုပေါင်း ၄၀,၀၀၀ ကျော်ရှိပြီး သက်ငယ်မုဒိမ်းမှုသည် ၁,၃၀၀ ကျော် ဖြစ်ခဲ့ပြီး ၁၃ နာရီတွင် အမျိုးသမီး တစ်ဦးခန့် မုဒိမ်းကျင့်ခံနေရသည်ဟု မြန်မာနိုင်ငံရဲတပ်ဖွဲ့က ခန့်မှန်းတွက်ချက်ထားကြောင်း ကိုသာလွန်ဟိန်းကပြောသည်။

ရန်ကုန်တိုင်းဒေသကြီးတွင် မုဒိမ်းမှု အဖြစ်အများဆုံးဖြစ်ပြီး ၂၀၁၃ ခုနှစ်အတွင်း ရန်ကုန်တိုင်းဒေသကြီးတွင် စုစုပေါင်း မုဒိမ်းမှု ၉၃ မှု ဖြစ်ခဲ့ကာ အသက် ၁၀ နှစ်အောက် ၇၉ မှု နှင့် အသက်၎ နှစ်နှင့် ၅ နှစ်အကြား ခုနစ်မှု ရှိသည်ဟု မြန်မာနိုင်ငံရဲတပ်ဖွဲ့၏ စာရင်းဇယားများတွင် ဖော်ပြထားသည်။

"များသောအားဖြင့် မြန်မာနိုင်ငံမှာ မုဒိမ်းမှု ကျုးလွန်တဲ့သူတွေကတော့ ရာဇ၀တ်မှုကျုးလွန်ခဲ့ဖူးတဲ့သူ၊ အရက်သေစာ သောက်သုံးတဲ့သူ၊ မူးယစ်ဆေးဝါးသုံးစွဲတဲ့သူတွေ ဖြစ်တယ်ဆိုတာတွေ့ရှိရပါတယ်"ဟု ၎င်းကပြောသည်။

မြန်မာနိုင်ငံတွင် တွေ့မြင်ရသည့် မုဒိမ်းမှုများတွင် အုပ်စုဖွဲ့ မုဒိမ်းကျင့်ခြင်းထက် တစ်ဦးချင်းစီကျုးလွန်မှုများဖြစ်ပြီး မုဒိမ်းမှုကျုးလွန်ရန် ကြိုတင်အကွက်ချ စီစဉ်လေ့ရှိကာ မုဒိမ်းမှုနှင့် လူသတ်မှုများမှာ ချိတ်ဆက်မှုရှိကြောင်း ကိုသာလွန်ဟိန်းက ပြောသည်။

မုဒိမ်းမှု ကျူးလွန်မှုများကို ပိုမိုကြားမြင်လာရသည့်အတွက် အရွယ်ရောက်ခါစ မိမိ၏ သမီးငယ်လေးအတွက် စိုးရိမ်မိကြောင်း မုဒိမ်းမှု ကြိုတင်ကာကွယ်နည်း နှီးနှောဖလှယ်ပွဲကို သမီးနှင့်အတူတက်ရောက်လာသည့် လမ်းမတော်မြို့နယ်တွင် နေထိုင်သော ဒေါ်စောကြည်က ပြောသည်။

"သမီးက အခုမှ ဆယ်တန်းအောင်ခါစ အသက် ၁၆ နှစ်ပဲ ရှိသေးတာ။ ကိုယ်ကအမြဲတမ်းလိုက်စောင့်ကြည့်နိုင်တာ မဟုတ်ဘူးလေ။ တစ်ခါတလေ မလွှဲသာလို့ အပြင်လွှတ်လိုက်ရရင်စိုးရိမ်နေရတယ်။ သူ့ကိုလည်း ဗဟုသုတ ရစေချင်လို့ အတူတူလာတက်ဖြစ်တာပါ" ဟု ၎င်းကပြောသည်။

မုဒိမ်းမှုကိုကာကွယ်ရန်အတွက် မြန်မာနိုင်ငံတွင် ဥပဒေပြဋ္ဌာန်းမှုနှင့် ဆောင်ရွက်မှုများတွင်အားနည်းချက်ရှိနေကြောင်းနှင့် အရွယ်ရောက် အမျိုးသမီးငယ်များအတွက် မုဒိမ်းမှုခုခံကာကွယ်ရေးသင်တန်းများ၊ အသိပညာပေး လုပ်ငန်းများကို အစိုးရနှင့် ပြည်တွင်းအမျိုးသမီးအဖွဲ့အစည်းများက ဆောင်ရွက်ရန် လိုအပ်ကြောင်း ကိုသာလွန်ဟိန်းက ပြောသည်။

ရန်ကုန်တိုင်းဒေသကြီး၌ ကိုးလတာကာလအတွင်း မုဒိမ်းမှု ၁၁၄ မှုအပါအ၀င် အမှုပေါင်း ၂၅,၂၉၆ မှု ဖြစ်ပွား

တိုးဝေအောင်   |   Wednesday, 09 October 2013

ရန်ကုန်တိုင်းဒေသကြီးအတွင်း ယခုနှစ် ကိုးလတာကာလအတွင်း မုဒိမ်းမှုဖြစ်ပွားမှုနှုန်းမှာ ၁၁၄ မှုဖြစ်ပွားခဲ့ပြီး အမှုပေါင်း ၂၅,၂၉၆ မှုဖြစ်ပွားခဲ့ကြောင်း ရန်ကုန်တိုင်းဒေသကြီးရဲတပ်ဖွဲ့၏ ထုတ်ပြန်ချက်များအရ သိရသည်။

ရန်ကုန်တိုင်းဒေသကြီးရဲတပ်ဖွဲ့၏ထုတ်ပြန်ချက်များအရ ၂၀၁၃ ခုနှစ်၊ ဇန်န၀ါရီလ ၁ ရက်နေ့မှ စက်တင်ဘာလ ၃၁ ရက်နေ့ အထိ ဖြစ်ပွားခဲ့သည့် အမှုများတွင် လူသတ်မှု ၉၂ မှု၊ ဓားပြမှု သုံးမှု၊ လုယက်မှု ၂၀ မှု၊ မုဒိမ်းမှု ၁၁၄ မှု၊ ဖောက်ထွင်းမှု ၁၀ မှု တို့ဖြစ်ပွားခဲ့ပြီး တရားစွဲတင်သည့် အမှု ၁၉၉ မှု၊ ပိတ်သိမ်းမှု ငါးမှု နှင့် လက်ကျန် ၃၅ မှုရှိခဲ့သည်။

အခြားအမှုများဖြစ်သည့် ပြည်သူပိုင်ပစ္စည်းကာကွယ်စောင့်ရှောက်ရေး ဥပဒေဖြင့် အရေးယူမှု ၆၁ မှု၊စက်ဘီးခိုးမှု ၁၀ မှု၊ ဆိုင်ကယ်ခိုးမှု ၃၈ မှု၊ ကားခိုးမှု ၄၁ မှု၊ ခါးပိုက်နှိုက်မှု ၆၂ မှု၊ ခိုးမှု(ရိုးရိုး) ၆၁၇ မှု၊ လုယက်ခိုးမှု ၅၁ မှု၊ နာကျင်စေမှု(ရိုးရိုး) ၂,၀၁၅ မှု၊ ယာဉ်ကြောင့် နာကျင်စေမှု ၁,၇၉၉ မှုနှင့် ကျန်အခြားမှု ၅,၀၆၁ မှု တို့ဖြစ်ပွားခဲ့ပြီး တရားစွဲတင်သည့် အမှု ၇,၃၃၉ မှု၊ ပိတ်သိမ်းမှု ၃၃၃ မှု၊ လက်ကျန်အမှု ၂,၀၈၃ မှု ရှိခဲ့သည်။

ကြိုတင်ကာကွယ်မှုများဖြစ်သည့် လောင်းကစားမှု ၇၉၈ မှု၊လက်နက် ပုန်း ၄၇၂ မှု၊ ယစ်မျိုးမှု ၂,၇၅၃ မှု၊ ပြည့်တန်ဆာမှု ၁,၁၀၂ မှု၊ မူးယစ်ဆေးဝါးမှု ၂၁၂ မှု၊ ခြေချုပ်ဖောက်ဖျက်မှု ၃၂၀ မှု၊ ရဲအက် ၇,၄၃၁ မှု၊ ပြစ်မှုဆိုင်ရာကျင့် ထုံးဥပဒေပုဒ်မ ၅၄ အရ အရေးယူမှု ၁,၇၅၅ မှု၊ ဆင်ဆာမဲ့ဗီဒီယိုအခွေ ဖမ်းဆီးအရေးယူမှု ၄၅၉ မှု တို့ကိုအရေးယူခဲ့ပြီး တရားစွဲဆိုတင်ပို့မှု ၁၄,၉၁၈ မှု၊ ပိတ်သိမ်းမှု ၁၂၇ မှု၊ လက်ကျန်မှု ၂၅၇ မှု တို့ရှိခဲ့ကြောင်း သိရသည်။

မိမိပတ်ဝန်းကျင်တွင် ခိုးရာပါပစ္စည်းများနှင့် အစိုးရမှ ပြဋ္ဌာန်းထားသော ပစ္စည်များကို လက်ခံထုခွဲရောင်းချခြင်း၊ ထုခွဲပေးခြင်း၊ ဓားပြ၊လုယက်၊ ဆိုးသွမ်းသူများသတင်း၊ ရပ်ကွက်ကျေးရွာအတွင်းဧည့်စိမ်းများဝင်ရောက်သွားလာမှုအား စောင့်ကြည့်သတင်းပေးခြင်း၊ မိမိတို့ရပ်ကွက်အတွင်း ခိုး၊ ဆိုး၊လုယက်၊ ခါးပိုက်နှိုက်များကို လက်ခံထားသူများ အားကူညီအားပေးသူများသတင်း၊ လက်နက်ကိုင်သောင်းကျန်းသူများ သတင်း၊ လောင်းကစားမှုများသတင်း၊ တရားခံပြေး၊ ရဲဘက်ပြေး၊ စစ်ပြေး၊ရဲပြေးသတင်းများနှင့် လိုင်စင်မဲ့လက် နက်ခဲယမ်းမီးကျောက်များ လက်ဝယ်ထားရှိမှု၊ မူးယစ်ဆေးဝါးသတင်းများ နှင့် ဖောက်ခွဲမှုပြုလုပ်မှုများကို ကြိုတင်သိရှိပါက သက်ဆိုင်ရာ မြို့နယ်၊ ခရိုင်နှင့်တိုင်းဒေသကြီးရဲတပ်ဖွဲ့များထံ ဆက်သွယ် သတင်းပေးနိုင်ကြောင်း ထုတ်ပြန်ထားသည်။

Ref;Myanmartime