Popular Posts!

Thursday, April 23, 2015

ဖွံ့ဖြိုးမှုချို့ယွင်းတဲ့ အော်တစ်ဇင် (Autism) ရောဂါ အကြောင်း တစေ့တစောင်း


Autism, အော်တစ်ဇင်ရောဂါ, Autism Spectrum Disorder (ASD),,
အော်တစ်ဇင် ရောဂါဝေဒနာရှင် လူငယ်တဦး
ဧပြီလကို အမေရိကန်မှာတော့ အမျိုးသား အော်တစ်ဇင်ရောဂါ သတိမူရေး လှုပ်ရှားမှုလ (National Autism Awareness Month) အဖြစ် လှုပ်ရှားမှုတွေ လုပ်ကြပါတယ်။ ဧပြီလ ၂ ရက်နေ့ကိုလည်း အမျိုးသား အော်တစ်ဇင် ရောဂါနေ့ (National Autism Awareness Day) လို့တောင် သတ်မှတ်ကြ ပါတယ်။ သူတို့ ဆီမှာတော့ အခုလို ဧပြီလ ဆိုရင် ဝါနီပြာရောင်စုံ ဂျစ်ဆော ဒီဇိုင်းလေးတွေပါတဲ့ ဖဲပြားပုံ logo ကလေးတွေနဲ့ နိုင်ငံတဝှမ်းမှာ အော်တစ်ဇင် သတိမူရေး ဆိုင်ရာ လှုပ်ရှားမှုတွေ လုပ်ဆောင်နေကြပြီ လို့ သိရပါတယ်။
ကားတွေ၊ ကြော်ငြာ ဘုတ်တွေမှာ အောက်က logo လေးကပ်တာ၊ ရင်ထိုး အဖြစ် ရင်ဘတ်မှာ ထိုးတာ၊ အော်တစ်ဇင် အကြောင်း ကျယ်ကျယ်ပြန့် ပြန့် သိအောင် ဟောပြောကြတာ၊ အောတစ်ဇင် ဝေဒနာရှင်တွေနဲ့  လူထုကို ထိတွေ့ စေတာ၊ သူတိုရဲ့ စွမ်းဆောင်ရည်တွေ ပြသတာ၊ အော်တစ်ဇင်ဆိုင်ရာ ပရဟိတ အဖွဲ့တွေကို လှူဒါန်းကြတာတွေ လုပ်ကြ ပါတယ်။
အခုခေတ်မှာ အော်တစ်ဇင်နဲ့ ပတ်သက်တဲ့ သတိမူရေး အသိပေးတာတွေ ကမ္ဘာတဝှမ်းမှာ လုပ်လာနေကြတာ အများကြီး ပါ။ မြန်မာနိုင်ငံမှာလည်း လုပ်နေကြ ပါတယ်။ တကယ်တော့ ခေတ်သစ် ဆေးသပ္ပံပညာတွေ ကနေ အော်တစ်ဇင် ဝေဒနာကို  သိမြင် နားလည်လာကြလို့ ပါပဲ။ အဲဒါကြောင့် အော်တစ်ဇင် ဆိုတာကို အခြေခံလောက် သိထားကြရင် ကောင်းမယ် လို့ တွေးမိ လာပါတယ်။
အော်တစ်ဇင် ( Autism)  ဆိုတာ ဘာလဲ
အော်တစ်ဇင် ဆိုတာက ဖွံ့ဖြိုးမှု ချို့ယွင်းတဲ့ ရောဂါ တခုလို့သာ အကျဉ်းရုံး ပြောရမယ် ထင်ပါတယ်။ ဖြစ်တတ်တဲ့        ချို့ယွင်းချက် ဆိုင်ရာတွေက များပြားကျယ်ပြန့်တာမို့ Autism Spectrum Disorder (ASD) လို့လည်း ခေါ်ကြပါတယ်။
အော်တစ်ဇင်က ဦးနှောက်ကို ထိခိုက်စေတာ ဖြစ်ပြီး လူတွေနဲ့ ပေါင်းသင်း ဆက်ဆံရာ၊ တုံ့ပြန် လှုပ်ရှားရာမှာ အခက်တွေ့ စေတာ ပါပဲ။ (စကားပြောတာ၊ ကစားတာ၊ အာရုံ စူးစိုက်တာနဲ့ တခြား လူမှုရေးဆိုင်ရာ ကိစ္စအားလုံးပေါ့)။ အော်တစ်ဇင်ထဲ အကျုံးဝင်တဲ့ သူတွေမှာ စကားပြောဖို့၊ ဘာသာစကားတွေ နားလည်ဖို့ အခက်အခဲတွေကို ငယ်ငယ် လေးကတည်းက ကြုံကြရတာလည်း ပါပါတယ်။ ကစားခုန်စားနဲ့ ပတ်သက်တာတွေလည်း နားလည်မှု မရကြပါဘူး။ ဆယ်ကျော်သက် အရွယ် ရောက်ရင်လည်း အဝတ်အစား၊ အားကစားနဲ့ အာရုံစူးစိုက်မှု၊ ဘာသာစကား နားလည်မှု တွေမှာ ခက်ခဲပြီး ဒုက္ခကြုံကြရ ပါတယ်။
တယောက်နဲ့ တယောက် ချို့ယွင်းချက် တွေတော့ မတူကြပါဘူး။ တချို့က အနည်းအကျဉ်းလောက် ဖြစ်ပြီး တချို့ ကျတော့လည်း ဆိုးဆိုးရွားရွား ပါပဲ။ တချို့ကျတော့လည်း ထူးထူးဆန်းဆန်း ဂီတ၊ ကွန်ပျူတာနဲ့ အနုပညာတွေမှာ ထက်မြက်ကြ ပြန်ပါတယ်။ တချို့ကျတော့လည်း စကားတောင် မပြောနိုင်၊ ဟန်ချက်တောင် မထိန်းနိုင် ဖြစ်ကြရပြန် ပါတယ် အော်တစ်ဇင် ၄၀% လောက်က ဉာဏ်ရည်မှာ ပုံမှန်၊ ဒါမှမဟုတ် ပုံမှန်ထက် ပိုကြပြီး ၆၀% လောက်ကတော့ အနည်းအကျဉ်း ကနေ ဆိုးရွားတဲ့ အထိ ခံစားကြရ ပါတယ်။
အကြောင်းရင်း မတိကျ
ဆေးပညာနဲ့ သုတေသနတွေ အများကြီး စူးစမ်းကြပေမယ့် တိကျတဲ့ အကြောင်းရင်းကိုတော့ မသိကြရ သေးပါဘူး။ ဗီဇနဲ့ ပတ်ဝန်းကျင် ဆိုင်ရာ အချက်အလက်တွေနဲ့ သက်ဆိုင်မယ် လို့သာ မှန်းဆကြ ပါတယ်။ မိသားစုထဲမှာ အော်တစ်ဇင် ရှိရင် ဖြစ်နိုင်ခြေ များတယ် လို့ တွေ့ကြ ပေမယ့် တကယ်တမ်း မိဘကနေ သားသမီးကို မျိုးရိုးလိုက်တဲ့ အထောက်အထားလည်း မတွေ့ရဘူးလို့ ဆိုပါတယ်။
သေချာတာကတော့ အော်တစ်ဇင် ဆိုတာ ကူးစက်ရောဂါ မဟုတ်ဘူး ဆိုတာပါပဲ။ အော်တစ်ဇင် ဖြစ်နေသူကနေ တခြားသူကို ကူးစက်ဖြစ်ပွား တာတော့ လုံးဝမရှိဘူးလို့ ဆိုပါတယ်။ ဗိုင်းရပ်စ် ကြောင့်လား၊ ဓာတ် မတည့်တာတွေ ကြောင့်လား၊ ကာကွယ်ဆေးတွေ ကြောင့်လား ဆိုပြီး မျိုးစုံထင်မြင် စမ်းသပ်ကြပေမယ့် တခုမှ သေသေချာချာ သက်သေပြလို့ မရခဲ့ပါဘူး။
ဘာကြောင့် ဒီလို မရေရာတဲ့ အဖြေ ဖြစ်နေရသလဲ ဆိုတော့ ဦးနှောက်ကိုယ်တိုင်က ရှုပ်ထွေးတဲ့ ပစ္စည်း ဖြစ်နေလို့ပါ ဆိုပြီး အကြောင်းပြကြ ပါတယ်။ အခုတော့ ဗီဇအပေါ် အဓိကထား အဖြေရှာကြည့် နေကြတယ် လို့ ဆိုပါတယ်။
အော်တစ်ဇင်ကို ဘယ်လိုသိမလဲ
အော်တစ်ဇင် ဖြစ်နေတာကို သိရတာ ကတော့ အသက် ၁၈ လ ကနေ ၄ နှစ် အတွင်းမှာ ပါ။ ဘာသာစကား နားလည်မှုနဲ့ သင်ယူမှု အခက်အခဲတွေ ကနေ သိကြရတာပါ။ ဆေးပညာ ဆိုင်ရာ စမ်းသပ်ချက်တွေနဲ့ အဖြေရှာလို့ မရပါဘူး။ တခြားပြဿနာတွေ ဖြစ် မဖြစ် အတွက်သာ စမ်းသပ်ကြရပါတယ်။ ဥပမာ-နားလေးလို့၊ မကြားလို့ နားမလည်နိုင် တာလား ဆိုတာမျိုး စမ်းသပ်ရတာပါ။
အော်တစ်ဇင် ဖြစ်နေတာကို အတည်ပြုဖို့က ပညာရှင်တွေ အများကြီးလိုပါတယ်။ စိတ်ပညာရှင်၊ အာရုံကြောအထူးကု၊ စကားပြော သင်ကြားသူ၊ စိတ်ရောဂါကု ဆရာဝန်နဲ့ ကလေးဖွံ့ဖြိုးမှု ဆိုင်ရာ အထူးကုတွေရဲ့  အကြံပြုချက်တွေ ရယူရပါ တယ်။ သူတို့နဲ့ ရွယ်တူ တန်းတူ ကလေးသူငယ်တွေရဲ့ အပြုအမူတွေ၊ ဖွံ့ဖြိုးမှုတွေနဲ့ နှိုင်းယှဉ် ဆုံးဖြတ်ကြရတာပါ။
ဘယ်လို အနေအထားတွေက အော်တစ်ဇင် ဖြစ်နေတယ်လို့  ယူဆရမလဲ
ဆယ်ကျော်သက် အရွယ်တွေမှာတော့ သင်ယူမှုနဲ့ ပေါင်းသင်း ဆက်ဆံမှု ပြဿနာတွေက အဓိက ပါပဲ။ တချို့ကတော့ တခြား ဆယ်ကျော်သက်တွေနဲ့ အတူတူလို့ ထင်ကြရပေမယ့် စိတ်ဝင်စားမှုနဲ့ သင်ယူမှု တွေမှာတော့ ခြားနားတာတွေ့ ရမှာပါ။ တချို့ ကျတော့လည်း တခုခုမှာ ထူးခြားထက်မြက် နေတတ်ပြန် ပါတယ်။ တချို့ အော်တစ်ဇင် ကလေးတွေ ကတော့ သူတို့ အပေါင်းအဖော်တွေနဲ့ ကျောင်းသွားတာမျိုး လုပ်နိုင်ကြပါတယ်။
အတန်အသင့် ကနေ ဆိုးရွားတဲ့ အဆင့် ရှိတဲ့ ဝေဒနာရှင်တွေကတော့ ပုံမှန်အလုပ်တွေ မလုပ်နိုင်ကြပါဘူး။ စကားတောင် ပြောလို့ မရအောင် ဖြစ်ကြရပါတယ်။ အာရုံ မစူးစိုက်နိုင်တာ၊ ရိုင်းပျသလို အမူအယာတွေ လုပ်တာပါ တွေ့ရတတ် ပါတယ်။ တခုခုကို ထပ်ပြန်တလဲလဲ လုပ်တာ၊ ကိုယ်ခန္ဓာအစိတ်အပိုင်း တခုခုကို လှုပ်နေတာ၊ ကြားမိတဲ့ စကားတခွန်းကို အပ်ကြောင်းထပ်ပြီး ပြောနေတာတွေ တွေ့ရတတ်ပါတယ်။
တချို့ ကျတော့လည်း အများနဲ့ ပြောဆို ဆက်ဆံ အာရုံစိုက်ဖို့ အဆင် မပြေတာကြောင့် အထီးကျန် နေတတ်ကြ ပါတယ်။ စတာ၊ နောက်တာ၊ ဟာသပြောတာတွေ ကိုလည်း နားမလည်ကြ ပါဘူး။ စကားပြော သင်ကြားပေးလို့ လိုက်ပြီး သင်ယူရင်တောင်မှ အသံက နိမ့်မြင့်တက်ကျ မလုပ်တတ်ရှာကြ ပါဘူး။ သူတို့ လုပ်နေတဲ့ အပြုအမူတခုခုကို သိနေရင်တောင်မှ ရပ်တန့်ဖို့ မထိန်းသိမ်းနိုင်ကြပါဘူး။ သူတို့ရဲ့ ခံစားချက်ကို သူတို့ ထုတ်ဖော် မပြတတ်တဲ့ အတွက် စိတ်လှုပ်ရှား ခံစားမှု မရှိသလို ဖြစ်နေတတ် ပါတယ်။ အဲသလိုပဲ သူများရဲ့ ခံစားတင်ပြ တာတွေ ကိုလည်း နားမလည်ကြ ပါဘူး။
ဆေးကု၍ မရပါ
အမှန်အတိုင်း ဆိုရရင်တော့ အော်တစ်ဇင်ကို ပျောက်ကင်းစေတဲ့ ကုထုံး မရှိပါဘူး။ ဘာသာစကားတွေ နားလည်ဖို့၊ ဘဝမှာ အရေးကြီးတာတွေကို နားလည်ဖို့၊ လူမှုရေးနဲ့ အပြုအမူတွေ ဖွံ့ဖြိုးဖို့၊ သူတို့ရဲ့ နေ့စဉ်ဘဝ ကိစ္စလေးတွေကို သူတို့ ဖာသာ ဖြေရှင်းနိုင်ဖို့သာ ကူညီတဲ့ ကုထုံးတွေ လုပ်ရပါတယ်။ အသက် ၅ နှစ်အောက် အရွယ်တွေမှာ စတင်ပြီး လေ့ကျင့် သင်ကြား ပေးတာက အသင့်လျော်ဆုံး လို့ ဆိုပါတယ်။ စောနိုင်သမျှ စောစော လုပ်ပေးလေ ကောင်းလေ ပါပဲ။
အော်တစ်ဇင်ကို ကုသတဲ့အခါ-
·       အမူအကျင့်ဆိုင်ရာ ကုထုံး (အပြုအမူတွေ ကျွမ်းကျင်အောင် သင်ယူစေတာပါ)
·       ပညာရေး ကုထုံး (ကျောင်းသင်ဘာသာရပ်တွေနဲ့ ထိတွေ့စေတာပါ)
·       စကားပြောသင် ကုထုံး( စကားတွေ နားလည်အောင်၊ ပြောတတ်အောင် သင်ပေးတာပါ)
·       အလုပ်ပေး ကုထုံး (ဟန်ချက် ထိန်းနိုင်အောင်၊ စာရေးနိုင်အောင် စသဖြင့် သင်ကြားစေတာပါ)
·       လူမှုဆိုင်ရာ ကုထုံး ( ဘယ်လို ကစားရမယ်၊ တခြားသူတွေနဲ့ ဘယ်လိုပြောရမယ် ဆိုတာ သင်ပေးတာပါ)
·       ဆေးဝါး (အာရုံစူးစိုက်မှု၊ ဂဏှာမငြိမ်မှုနဲ့ အိပ်စက်ခြင်းဆိုင်ရာ အခက်အခဲတွေ အတွက် ဆေးတွေ သုံးရတာပါ)
·       အစားအသောက်၊ ဂီတ၊ ပန်းချီ စတာတွေနဲ့လည်း အသုံးပြု ကုသကြရပါတယ်။
တခြားသူတွေလို ကျောင်းတက်ဖို့ ဘယ်လိုမှ မစွမ်းတဲ့ ဆယ်ကျော်သက်တွေ အဖို့တော့ သီးသန့် ကျောင်းတွေ၊ သင်ကြားနည်းတွေ သုံးကြပါတယ်။
အော်တစ်ဇင် ကို သတိမူမိဖို့ 
ကလေးတယောက်ဟာ အော်တစ်ဇင် ဖြစ်နေတယ် လို့ ယူဆရတဲ့ အပြုအမူ တွေ့ခဲ့ရင် ပထမဦးဆုံး အချက်က မိဘ အသိုင်းအဝိုင်းက နားလည်လက်ခံအောင် လုပ်ရတာပါ။ အထက်မှာ ဆိုခဲ့သလို ဖွံ့ဖြိုးမှု ဆိုင်ရာ အခက်အခဲတွေ ရှိလာရင် အော်တစ်ဇင်ကို မမေ့ဖို့၊ စဉ်းစားဖို့ လိုပါပြီ။ အော်တစ်ဇင် ဆိုတာ သေချာပြီ ဆိုရင်လည်း လုပ်စရာရှိတာတွေ ဆက်လုပ်ရမှာ ပါ။
လုံးလုံးလျားလျား ပျောက်ကင်းသက်သာသွားဖို့ ဆိုတဲ့ မျှော်လင့်ချက် မထားဘဲ သူ့တကိုယ်ရည် တတ်နိုင်သမျှ စွမ်းဆောင် နိုင်အောင်၊ တခြားသူတွေနဲ့ ပေါင်းသင်းဆက်ဆံ ပြောဆိုရာမှာ အဆင်ပြေအောင် အဓိက ဦးတည်ရမှာ ပါ။ အရေးအကြီးဆုံးက အဲဒီကလေးတွေ ဆယ်ကျော်သက်တွေ အတွက် မိမိဘာသာ အန္တရာယ်ဖြစ်တာတွေ မလုပ်မိစေဖို့၊ တပါးသူက အန္တရာယ်ပြုလာတဲ့ အခါ နားလည်တုံ့ပြန်နိုင်ဖို့ တွေကို စိတ်ရှည် လက်ရှည် လေ့ကျင့်ပေး သင်ကြားပေး ရမှာပါ။
အော်တစ်ဇင်က ဝဋ်နာ ကံနာ လိုမျိုးမို့ မဖြစ်အောင် ဘယ်လို ကာကွယ်ရမယ် ဆိုတာ မပြောနိုင်သလို၊ ဖြစ်ရင်လည်း ပျောက်ကင်းနိုင်တာ မဟုတ်လို့ ဘဝမှာ အမှီအခို နည်းနိုင်သမျှ နည်းအောင် ရပ်တည်နိုင်ရေးကိုသာ ရည်ရွယ်ချက်ပြီး ကူညီပေးကြရမှာ ပါ။
ကာယကံရှင်ရဲ့ မိသားစု အသိုင်းအဝိုင်းရော၊ ပတ်ဝန်းကျင်က မိတ်ဆွေသင်္ဂဟ အနေနဲ့ရော အော်တစ်ဇင် ဝေဒနာရှင် တွေကို ပံ့ပိုးပေးရင်း သူတို့ဘဝမှာ အန္တရာယ်ကင်းအောင်၊ စွမ်းသမျှလေးနဲ့ ရှင်သန်နေထိုင် သွားနိုင်အောင် ဆောင်ရွက် ပေးသင့် ကြပါတယ်။     ။

Ref:irrwaddyburmese
Post a Comment

Gadget

This content is not yet available over encrypted connections.

*** လာလည်သောအပေါင်းအသင်းများ မိမိ ASN GROUP ONLINE SHOP ကနေ သင်တို့အလိုရှိသောပစ္စည်းများကို ရှာဖွေပြီး ORDER မှာလို့ရနေပါပြီ ***

ASNGROUP WAREHOUSE DEALS DEEPS DISCOUNT!