Popular Posts!

Thursday, April 16, 2015

ပြိုလဲနေတဲ့ အိမ်ခြံမြေဈေးကွက်ကို ကျားကန်ဖို့ကြိုးစားတဲ့ မြစ်ကူးတံတား ၂ စင်းကြေညာချက်

. . . . . . . . . . . . .

ပြိုလဲနေတဲ့ အိမ်ခြံမြေဈေးကွက်ကို ကျားကန်ဖို့ကြိုးစားတဲ့ မြစ်ကူးတံတား ၂ စင်းကြေညာချက်
====================================================

ဒေါ်လာ သန်း ၅၅၀ ကို ရင်းနှီးမြုတ်နှံရန် စင်္ကာပူကုမ္ပဏီဘက်မှငြင်းဆို ခဲ့သည့် သတင်းသည် မြန်မာ့အိမ်ခြံမြေ ဈေးကွက်ကျဆင်းနေမှုကို လူသိရှင်ကြား ဖော်ပြလိုက်ခြင်းနှင့်တူသည်

ရန်ကုန်မြို့ ကမ္ဘာအေးဘုရားလမ်း လမ်းနီလေးမှတ်တိုင်ရှိ ၁၈ဧက ကျယ်သောမြေနေရာတွင် ဆောက်လုပ်နေသော အဆောက်အဦးစီမံကိန်းသို့ ပါဝင်ရန် စင်္ကာပူအုပ်စုဘက်မှ ငြင်းဆန်ခဲ့ခြင်းဖြစ်သည်

မြန်မာနိုင်ငံ၏ အိမ်ခြံမြေဈေးကွက်သည် ငွေမည်းများ၏ ဆုံရပ်ဖြစ်နေသည် လုပ်ပိုင်ခွင့် အလွဲသုံးစားလုပ်ကာ အကျင့်ပျက်ခြစားမှု၏ ပြယုတ်လည်းဖြစ်နေသည်

၂၀၁၀ နောက်ပိုင်း မြန်မာနိုင်ငေံတဝှမ်းလုံးရှိ အိမ်ခြံမြေဈေး ကိန်းဂဏန်းများကိုကြည့်လျှင် ဥပဒေပြုမှုအပိုင်း အလွန်အားနည်းပြီး ပြည်တွင်းငွေမည်းများ ပြည်ပစီးဝင်ငွေမည်းများ မူယစ်ဆေးဝါးငွေမည်းများဖြင့် ပရမ်းပတာဖြစ်နေသည်ကို အထင်အရှားတွေ့မြင်နိုင်သည်

ထိန်းချုပ်ကန့်သတ်ရန်ပျက်ကွက်နေသော ငွေမည်းများက ဝယ်လိုအားအတုများကိုဖြစ်စေသည် ဝယ်လိုအားအတုကြောင့် ရောင်းလိုအားအတုကို ဆက်ဖြစ်စေသည် ဝယ်လိုအားအတု ရောင်းလိုအားအတုများက လည်ပတ်ထွန်းကား အင်အားကြီးခိုင်မာနေသယောင် ဈေးကွက်အတုကိုဖြစ်စေသည်

ဈေးကွက်အတုက ရေရှည်တည်တန့်မှုမရှိသော အလုပ်အကိုင်အတုများကိုဖန်တီးပေးသည် မျှော်လင့်ချက်အတုများကို ဖန်တီးပေးသည် တွေ့တုန်းဝယ်ထားမမှားဘူးဆိုသည့် ငါ့စကော ကောလာဟလများက လူငယ်များ၏ တီထွင်ဖန်တီးမှုစွမ်းရည်ကို လမ်းမှားပို့ ချောက်ထဲတွန်းချလိုက်တော့သည်

လယ်မြေယာမြေများကို လက်သိပ်ထိုးကြိုတင်ဝယ်ယူထားသော လုပ်ပိုင်ခွင့်ရှိသူများနှင့် ခရီုနီအပေါင်းအပါတစ်သိုက်က လွှတ်တော်အတုကိုခုတုံးလုပ်ကာ ၁၉၆၃ တောင်သူလယ်သမားအခွင့်အရေး ကာကွယ်ရေးဥပဒေကို အချိန်ကိုက်၍ တက်ညီလက်ညီဖျက်သိမ်းခဲ့ကြသည်

၁၉၆၃ တောင်သူလယ်သမားအခွင့်အရေးကာကွယ်ရေးဥပဒေအရ လယ်လုပ်သူသာ လယ်ပိုင်ရမည်ဖြစ်ပြီး လယ်သမားများသည် အစိုးကြွေးမြီမှတပါး မည်သည့်ကြွေးမြီများကိုမှ ပြန်ဆပ်ရန်မလိုပေ လယ်သမားကခေါင်းခါလိုက်ရုံမျှဖြင့် လယ်ပေါင်လယ်ရောင်း ငွေချေး မည်သည့် သဘောတူစာချုပ်မဆို အဆိုပါဥပဒေအရ ပျက်ပြယ်သွားမည်သာဖြစ်သည်

ဒီမိုကရေစီနာမည်တပ်ပြီးစ မြန်မာနိုင်ငံတွင် လူအများစုဖြစ်သော တောင်သူလယ်သမားများကို လုံလောက်သော အသိပညာဖြည့်တင်းမှု တန်းဝင်လူ့စွမ်းရည်မြှင့်တင်မှုများမလုပ်ပဲ ကြိုက်ဈေးခေါ်မြေရောင်းခွင့်ပေးလိုက်ခြင်းသည် ဦးသူယူ လျှင်သူစား အားကြီးသူနိုင်ထားဆိုသည့် အလေ့အထကြီးကို တဖန်စတင်ကာ မြန်မာတစ်နိုင်လုံးရှိ မြေယာများကို မီးလောင်တိုက်ထဲသွင်းလိုက်သည့်နှယ်တူသည် အဆုံးအစမရှိ သောကသံသရာထဲ တွန်းပို့လိုက်သည်နှင့်တူသည်

သို့နှယ် ၂၀၁၀ နောက်ပိုင်း မြန်မာနိုင်ငံတွင် မြေယာ ပူဖောင်းဈေးကွက်ကြီး အကွက်ကျကျနှင့် ကြီးထွားလာသည် ပညာတတ်လူငယ်များအားလုံးနီးပါး ရှိသမျှငွေတိုငွေစများဖြင့် မြေယာပူဖောင်းဈေးကွက်ထဲ အပြိုင်ကြဲကြလေတော့သည် လူစွမ်းအားအရင်းအမြစ်များမြှင့်တင်ကာ အဆင့်မီထုတ်ကုန်များ အသိဉာဏ်ရောင်းကုန်များဖြင့် ကမ္ဘာ့ဈေးကွက်အတွင်း ထိုးဖောက်ဝင်ရောက်ရေး ဆိုသည့် အသံများသည်လည်း ခြောက်ခြောက်ကပ်ကပ်နှင့် ဟန်ပြသက်သက်ဖြစ်သွားခဲ့သည်

အစကတည်းက အခြေခံအဆောက်အအုံများမရှိပဲ ပူဖောင်းသဏ္ဍန်ကြီးထွားလာသော အိမ်ခြံမြေဈေးကွက်သည် အလွဲသုံးစားမှုများဖြင့်ချမ်းသာလာသူ ခရိုနီတစ်ပိုင်း ဦးအောင်သောင်းကို အမေရိကန်အစိုးရမှ အမည်ပျက်စာရင်း ထည့်သွင်းလိုက်ချိန်မှစတင်ကာ တုန့်ဆိုင်းလာသည် အလားအလာမြင်သူများက ရှိသမျှမြေကွက်များချရောင်းကာ ဒေါ်လာဝယ် ရွှေဝယ် ဘဏ်ထဲထည့် စသဖြင့် အပြေးအလွှား ပုံစံပြောင်းကြ၏ ရုတ်ချည်းဆိုသလို ဘဏ်ချေးငွေဖြင့် အကြွေးဝယ်စနစ်ကြီးတစ်ခု ပေါ်ပေါက်လာသည် ငွေမည်းများကို ငွေဖြူလုပ်သော နားလှည့်ပါးရိုက်မှုကြီးပင်ဖြစ်သည်

ဒေါ်လာသန်း ၅၅၀ သည် လက်ရှိငွေလဲနှုန်း နှင့်ဆိုလျှင် မြန်မာငွေ ကျပ် ၆၀၀ ဘီလီယံကျော်ရှိသည် စင်္ကာပူအုပ်စုမှ ဒေါ်လာသန်း ၅၅၀ ကို ရင်းနှီးမြုတ်နှံရန် ငြင်းဆန်လိုက်မှုသည် ဒေါ်အောင်ဆန်းစုကြည်၏ ဦးသိန်းစိန်တွင် ရိုးသားမှုမရှိတော့ပြီ ဟူသော မှတ်ချက်နှင့် တိုက်ရိုက် သက်ဆိုင်နေသည် လက်ရှိအစိုးရ စစ်တပ် နှင့် လွှတ်တော်ထဲတွင် နေရာ အသီးသီး ယူထားကြသော ပြည်ခိုင်ဖြိုးအုပ်စုပါဝင်ပတ်သတ်နေသည့် လုပ်ပိုင်ခွင့် အလွဲသုံးစား ငွေကြေးအရှုပ်တော်ပုံ စာရင်းဇယားများသည် အီးယူနှင့် အမေရိကန် အစိုးရလက်ထဲ သက်သေသာဓကများနှင့်အတူ ခိုင်လုံစွာရှိနေလောက်ပြီဟု ယူဆနိုင်သည် အီးယူနှင့်အမေရိကန်တို့၏ အလားအလာရှိသော အမည်ပျက်စာရင်းကြေညာမှုများကြောင့် စင်္ကာပူအုပ်စု နောက်ဆုတ်သွားတန်ရာဖြစ်သည်ဟု ကောက်ချက်ချနိုင်သည်

လက်ရှိရိုက်နှိပ်ထုတ်ဝေကာ လှည့်လည်သုံးစွဲနေသော မြန်မာ့ကျပ်ငွေမည်၍မည်မျှရှိနေသည်ကိုလည်း မည်သူမှတပ်အပ်မပြောနိုင် ၁၉၈၈ မှ ၂၀၁၀ အတွင်း မြန်မာနိုင်ငံဗဟိုဘဏ်တွင် စာရင်းမသွင်းပဲ ရိုက်နှိပ်သုံးစွဲခဲ့သော ငွေကြေးငွေမည်းများလည်း ကြောက်ခမန်းလိလိ ရှိနိုင်သည် ဟူသော သတင်းများကိုလည်း ဗဟိုဘဏ်မှ ယနေ့တိုင် လုံလောက်သာ အာမခံချက်ကို အသုံးပြုကာ ဖြေရှင်းခဲ့မှုများ မမြင်တွေ့ရသေးပါ

ဧပြီ ၁၂ ရက် ရက်စွဲဖြင့် ရန်ကုန်နှင့် ဒလ ရန်ကုန်နှင့် ကြည့်မြင်တိုင် တဖက်ကမ်း တံတားထိုးမည်ဟူသော သတင်းထွက်လာသည် မိုးကြိုးပစ်မည်ကို ထန်းလက်အားကိုး ကာကွယ်နေသည့်သဘောတွေ့ရသည် လက်ပူတိုက် မြေယာ ဝယ်ရောင်း ဈေးကွက်တစ်ခု အမြန်ဖော်ချင်နေပုံရသည် အမှန်မှာ အလိမ်အတုဈေးကွက်ကို ဟန့်လုံးခြောက်လုံးများနှင့် ကုစား၍ မရတော့

သမ္မတအကြံပေးဆိုသူ နိုင်ငံခြားပြန် ဦးမြင့်သည် ဆောင်းပါးရှင် နေထွန်းနိုင်ကို ခွန်းတန့်ပြန် မပြောခင် ထမင်းဆိုင်ဖွင့်ကာလမ်းဘေးဈေးရောင်းနေသော စာရင်းစစ်ချုပ်ဟောင်းနှင့် ထောင်ချခံထားရသော ဝန်ကြီးဟောင်းတို့ကို သွားရောက်တွေ့ဆုံကာ အမြင်ခြင်းဖလှယ်သင့်သည်

ပြည်သူအများကလည်း မြေကွက်တွေနော် တွေ့တုန်းဝယ်ထား ခြံခတ်လို့ တစ်နှစ်လောက်အောင်းထားရင် ဆယ်ဆလောက်မြတ်တယ်ဆိုတဲ့ အချောင်သမားစိတ်ဓါတ်အခြေခံ ကောလာဟလများကို နားလည်ကြရန် အချိန်တန်လေပြီ

လူအခြင်းခြင်းလှည့်ပတ်ခြင်း ကင်းရှင်းကြပါစေ

သာဓု သာဓု သာဓု


- Posted using BlogPress from my iPhone
Post a Comment

Gadget

This content is not yet available over encrypted connections.

*** လာလည်သောအပေါင်းအသင်းများ မိမိ ASN GROUP ONLINE SHOP ကနေ သင်တို့အလိုရှိသောပစ္စည်းများကို ရှာဖွေပြီး ORDER မှာလို့ရနေပါပြီ ***

ASNGROUP WAREHOUSE DEALS DEEPS DISCOUNT!