ရာသီဥတုပူပြင်းတဲ့အချိန်မှာ သတိထားသင့်တဲ့ မျက်စိနာရောဂါ (သို့) မျက်မြှေးရောင်ရောဂါ

ရာသီဥတုပူပြင်းတဲ့အချိန်မှာ သတိထားသင့်တဲ့ မျက်စိနာရောဂါ (သို့) မျက်မြှေးရောင်ရောဂါ

 

အချိန်အခါမရွေး ဖြစ်ပွားနိုင်ပေမယ့် ရာသီဥတုအပြောင်းအလဲဖြစ်တဲ့အချိန်နဲ့ ရာသီဥတုပူပြင်းတဲ့ အချိန်တွေမှာဆိုရင်တော့ ဖြစ်ပွားမှုပိုများတယ်လို့ မျက်စိအထူးကုဆရာဝန်ကြီးတွေက ဆိုပါတယ်။မျက်စိနာရောဂါနဲ့ပတ်သက်လို့ ပြည်သူတွေ သတိပြုကာကွယ်နိုင်ဖို့ရည်ရွယ်ပြီး ရန်ကုန်မျက်စိအထူးကုဆေးရုံကြီးနဲ့ ဆေးတက္ကသိုလ်(၁)၊မျက်စိရောဂါပညာဌာနက မျက်စိအထူးကုဆရာဝန်ကြီး ပါမောက္ခဒေါက်တာ ခင်ဥမ္မာခိုင်ကို မြန်မာတိုင်း(မ်)က တွေ့ဆုံမေးမြန်းဖြစ်ခဲ့ပါတယ်။

မျက်စိနာရောဂါ(သို့) မျက်မြှေးရောင်ရောဂါ(Conjunctivitis) ဆိုတာ Adeno ဗိုင်းရပ်စ်ပိုးကြောင့် အဖြစ်များတယ်လို့ မျက်စိအထူးကု ဆရာဝန်ကြီးတွေက မှတ်ချက်ပေးကြပါတယ်။အကြမ်းဖျင်းအားဖြင့် ဘက်တီးရီးယားနဲ့ ဗိုင်းရပ်စ်ကြောင့်ဆိုပြီး မျက်စိနာဖြစ်တာ နှစ်မျိုးရှိပြီးဗိုင်းရပ်စ်ကြောင့်ဖြစ်တဲ့ မျက်စိနာရောဂါ (Viral Conjunctivitis)က ၈ဝ ရာခိုင်နှုန်းအထိရှိတယ်လို့ သိရပါတယ်။

Q-မျက်စိနာရောဂါဖြစ်ပွားနိုင်တဲ့ အကြောင်းရင်းတွေကို ပထမဦးစွာ သိရှိလိုပါတယ်?

A-ပူတဲ့ရာသီနဲ့ရာသီဥတုအပြောင်းအလဲဆိုရင် ဗိုင်းရပ်စ်တွေကကြွတတ်တယ်။ အဲဒီအခါ မျက်စိနာတာအဖြစ်များပါတယ်။ ဆေးပညာအခေါ်ဆိုရင်တော့ မျက် မြှေး ရောင် တယ်ပေါ့။ မျက်စိနာတာက ဘက်တီးရီးယားကြောင့်ဖြစ်တာက ခပ်နည်းနည်း၊ ဗိုင်းရပ်စ်ကြောင့်ဖြစ်တာက ပိုများပါတယ်။များသောအားဖြင့် ဗိုင်းရပ်စ်တွေကတော့ ကိုယ့်အနီးအနားပတ်ဝန်းကျင်မှာရှိနေပေမဲ့ အဓိကကတော့ ကျွန်မတို့က အရာဝတ္ထုတွေကို လက်နဲ့ကိုင်တွယ်တဲ့အခါမှာမျက်စိနာတဲ့သူတွေရဲ့ရောဂါပိုးတွေက အဲဒီကနေတစ်ဆင့်ကူးတတ်ပါတယ်။ မျက်စိကနေ မျက်စိကို မကူးတတ်ဘူး။ ကိုယ့်လက်ကနေ မျက်စိကိုသွားထိတဲ့ ကိစ္စက အရေးကြီး တယ်။ ဒါကြောင့် လက်ကိုခဏခဏဆေးဖို့လိုတယ်။ ကိုယ်က မျက်စိမနာပေမဲ့ လက်နဲ့မျက်စိကိုထိခဲ့ရင် ကိုယ့်လက်ကနေ ရောဂါပိုးကူးတတ်ပါတယ်။ မျက်စိယားလို့ လက်နဲ့ပွတ်တာတွေက မကောင်းပါဘူး။ မျက်စိနာတဲ့အထဲမှာ Viral Conjunctivitis က အရမ်းကူးစက်လွယ်တယ်။ မျက်လုံးတစ်ဖက်တည်း ဖြစ်ချင်ဖြစ်မယ်၊ နှစ်ဖက်စလုံးလည်းဖြစ်တတ်တယ်။ ဒီလိုဖြစ်လာပြီဆိုလို့ရှိရင် ကိုယ့်ဘေးနာကလူတွေကို ကူးလွယ်တယ်။ နောက်တစ်ခုက အိမ်တွေမှာ မျက်နှာသုတ်ပဝါတွေကို မျှဝေသုံးစွဲတာတွေရှိပါတယ်။ အဲဒီလိုတူတူသုံး တယ်ဆိုလို့ရှိရင် နောက်တစ်ယောက်ကို ကူးမှာပဲ။ ဒါ့ပြင် Eye makeup စတဲ့ အလှကုန်အသုံး အဆောင်တွေကိုအတူတူသုံးတာကနေလည်းတစ်ဆင့် ကူးတာတွေရှိပါတယ်။နောက်တစ်ခုက ရေကူးကန်တွေပေါ့။ နွေရာသီကျောင်းပိတ်ရက်ဆိုရင် ရေကူးကြတာတွေလည်းများတယ်။ ကလိုရင်းသေချာခပ်ထားတဲ့ ရေကူးကန်တွေကတော့ အကြောင်းမဟုတ်ဘူး။ အဲဒါကြောင့် ကိုယ့်ကလေးမျက်စိနာနေရင် မလွှတ်ပါနဲ့လို့ ကျွန်မတို့ပြောတာတွေရှိပါတယ်။ အများနဲ့ထိတွေ့တော့ ဒီရေကူးကန်တွေကလည်း ကူးစက်နိုင်ပါတယ်။

Q-မျက်စိနာဖြစ်ရင်တွေ့ရမယ့် ရောဂါလက္ခဏာတွေကို သိပါရစေ?

A-မျက်စိနာတာက စစချင်းတော့ မျက်လုံးထဲမှာ ခိုးလိုးခုလုဖြစ်သလိုရှိတယ်။ မျက်စိကအောင့်သလိုနဲ့ နေရထိုင်ရခက်တော့ မျက်လုံးကို ပွတ်တာတွေ ရှိတယ်။ ပွတ်တဲ့အခါမျက်စိကနီရဲလာတယ်။မျက်ခွံလေးတွေ နည်းနည်းဖောင်းလာတယ်။ မျက်ဝတ်လေးတွေ ထွက်လာတယ်။ မျက်ဝတ်က အရောင်ဝါဝါကြီးတွေ မထွက်ဘူး။ Viral Conjunctivitis က မျက်ဝတ်မထွက်ဘဲ မျက်ရည်ကျတယ်။ မျက်ဝတ်ထွက်တယ်ဆိုရင်လည်း အရမ်းဝါထိန်တာမျိုးမဟုတ်ဘဲ ခပ်ကြည်ကြည်ပဲ။ မျက်ဝတ်ဆိုတာက ခန္ဓာကိုယ်မှာမျက်စိက နေရထိုင်ရခက်ရင် ကိုယ်ခန္ဓာကိုယ်တိုင်က မျက်ဝတ်ကို ထုတ်ပေးရတာဖြစ်ပါတယ်။

Q-မျက်စိနာရောဂါရဲ့ နောက်ဆက်တွဲအနေနဲ့ အမြင်အာရုံကို ကျစေလားဆိုတာ သိလိုပါတယ်?

A-မျက်စိနာတာဟာ ပုံမှန်ဆိုရင်တော့ အမြင်အားမကျပါဘူး။ တော်ရုံတန်ရုံ မျက်စိနာတာအစပိုင်းဆိုလို့ရှိရင် မျက်ဝတ်လေးရှိလို့ မျက်ရည်လေးကျလို့ ကြည့်ရခက်တာပဲ ရှိပါတယ်။ အမြင်အားကတော့ အပြည့်ကောင်းတယ်။ တချို့ကျတော့ ဗိုင်းရပ်စ်ရောဂါကြောင့် မျက်မြှေးရောင်တာတင်မကတော့ဘဲနဲ့ တစ်ပတ်၊ နှစ်ပတ် လောက်ကြာတဲ့အခါ မျက်ကြည်လွှာပေါ်မှာ အစက် အပြောက်လေးတွေဖြစ်တတ်တယ်။ အဲဒီအခါကျရင်တော့ အမြင်အားကျပါတယ်။ ကြည့်ရတာ ဝါးတားတားဖြစ်နေတယ်။ နေရောင်ထဲထွက်ရင် မခံနိုင်ဘူး။

Q-မျက်စိနာရင် ပျောက်ကင်းဖို့အချိန်ဘယ်လောက်ထိ ကြာတတ်ပါလဲ?

A-မျက်စိနာတာကတော့ ဘက်တီးရီးယားကြောင့်နဲ့ ဗိုင်းရပ်စ်ကြောင့်နာတာဆိုပြီး အကြမ်းဖျင်းနှစ်မျိုးရှိတယ်။ ဘက်တီးရီးယားကြောင့် မျက်စိနာတာကတော့ ငါးရက်ကနေ ခုနစ်ရက်လောက်ဆို ကောင်းတာပဲ။ ဗိုင်းရပ်စ်ကြောင့်ဖြစ်ရင်တော့ သူ့ထက်ပိုကြာနိုင်ပြိး နှစ်ပတ်ကနေ သုံးပတ်အတွင်း ကြာနိုင်တယ်။မျက်စိနာတာက အချိန်မရွေးဖြစ်တယ်။ ဒါပေမဲ့လူအများစုဖြစ်တတ်တဲ့ ကာလလေးတွေတော့ရှိတာပေါ့။ ရာသီဥတုအပြောင်းအလဲနဲ့ အခုလိုနွေရာသီဆို ပိုဖြစ်တယ်။ ဒီရောဂါက တစ်နှစ်မှာနှစ်ကြိမ်၊ သုံးကြိမ်လောက်ဖြစ်နိုင်တယ်။ ရာသီဥတုပူပြင်းရင်တော့ ပိုများတာပေါ့။

Q-ဘယ်လို အသက်အရွယ်မျိုးတွေမှာ ပိုဖြစ်တာတွေ့ရလဲဆိုတာ သိရှိလိုပါတယ်?

A-များသောအားဖြင့် ဗိုင်းရပ်စ်ကြောင့်မျက်စိနာတာ ကတော့ လူလတ်နဲ့ လူငယ်ပိုင်းတွေမှာဖြစ်တာ များတယ်။ အိမ်ထဲမှာပဲနေတဲ့ သက်ကြီးဘိုးဘွားတွေထက် စာရင် အပြင်နဲ့အထိအတွေ့များတဲ့သူတွေက ပိုဖြစ်တယ်။ကလေးနဲ့လူကြီးဆိုရင် ကလေးတွေရဲ့ကိုယ်ခံအားက လူကြီးလောက်မကောင်းတော့ ကလေးတွေမျက်စိနာရင် တော်တော်ဆိုးတယ်။ မျက်ခွံတွေကဖောင်းရောင်ပြီး တော့ နှစ်ဖက်စလုံးလည်းဖြစ်တတ်တယ်။ မျက်စိကလည်း ရဲတွက်နေတတ်ပါတယ်။

Q-မျက်စိနာရောဂါကို ဘယ်လိုကုသရပါသလဲဆိုတာ သိပါရစေ?

A-တကယ်တမ်းပြောရရင် မျက်စိနာတာဟာ ဆေးကုကု၊မကုကု သူ့ဘာသာသူ ကောင်းပါတယ်။ သူ့အလိုလိုပြန်ကောင်းတဲ့ရောဂါထဲမှာပါတယ်။ ဆေးခပ်ခပ်၊ မခပ်ခပ် ကောင်းတယ်။ ဒါပေမဲ့ တချို့မျက်စိနာတာက ဘက်တီးရီးယားကြောင့်နာပြီး သုံးရက်ထက်ပိုလာမယ်၊ မျက်ဝတ်တွေလည်း အများကြီးထွက်လာပြီး မျက်စိနာတာလည်း ဆိုးလာဆိုရင်တော့ ဆေးခတ်ဖို့လိုပါတယ်။ဗိုင်းရပ်စ်ကြောင့်ဆိုလို့ရှိရင်လည်း သူ့ဘာသာသူ ကောင်းလေ့ရှိတယ် ။ မျက်စိနာတဲ့ ကာလအတွင်းမှာဗိုင်းရပ်စ်ကိုကုနိုင်တဲ့ဆေးဆိုတာလည်း မရှိဘူး။ ဘက်တီးရီးယားမှာတော့ ရှိတယ်။ ပဋိဇီဝဆေး ( antibiotic) တွေနဲ့ ဘက်တီးရီးယားတွေကိုကုတယ်။ symptomatic treatment လို့ခေါ်တဲ့ သက်သာအောင်၊ နေသာအောင် ကုတဲ့ကုထုံးတွေနဲ့လည်း ကုတယ်။ဥပမာ မျက်ခွံကြီးတွေက ရောင်ပြီးတော့ရဲနေတယ်ဆိုရင် ရေခဲအုပ်တာမျိုးပေါ့။ အအေးဓာတ်ပေးတယ်။ ရေခဲအုပ်ခြင်းအားဖြင့် သွေးကြောတွေက ကျုံ့တဲ့အခါကျတော့ ရောင်တာလည်း သက်သာတယ်။ နီတာလည်း သက်သာတယ်။ နာတာလည်း သက်သာတယ်။နောက်တစ်ခုက မျက်ရည်အတုပေါ့။ မျက်စိက နေရခက်တဲ့အခါကျရင် မျက်စဉ်းလေးခတ်လိုက်ရင် ဖြေသာတယ်။ မျက်ရည်တုတွေက လူတွေကို အန္တရာယ် လည်းမရှိဘူး။ လူကိုနေသာအောင် ခတ်တာဆိုတော့ မျက်ရည်တုဆေးတွေ သုံးလို့ရပါတယ်။တကယ်လို့များ တချို့ဗိုင်းရပ်စ်တွေက သိပ်ပြင်းပြီးတော့ မျက်စိရောင်လွန်းရင်တော့ ကျွန်မတို့က အရောင်ကျတဲ့ဆေး (စတီးရွိုက်)တွေ ပေးရတယ်။ viral ကြောင့်ဖြစ်တဲ့ မျက်စိနာတဲ့ဟာဆိုရင် ဘက်တီးရီးယားပါ ကာကွယ်တဲ့အနေနဲ့ စတီးရွိုက် သတ်သတ်မပေးဘဲ စတီးရွိုက်နဲ့ ပဋိဇီဝဆေးကိုပါတွဲပြီးပေးတယ်။ မျက်ကြည်လွှာပေါ်မှာ အစက်အပြောက်လေးတွေဖြစ်လာရင်တော့ စတီးရွိုက်ကိုသုံးဖို့လိုအပ်ပါတယ်။ ဒီလိုပေးခြင်းအားဖြင့် စတီးရွိုက်ရဲ့အာနိသင်ကြောင့် ရောင်ယမ်းတာတွေသက်သာတယ်။ ဘယ်လိုပဲဖြစ်ဖြစ် ဗိုင်းရပ်စ်က နှစ်ပတ်ကနေ သုံးပတ်အထိကြာနိုင်ပါတယ်။

Q-မျက်စိနာမဖြစ်အောင် ဘယ်လိုပြုမူနေထိုင်သင့်ပါသလဲ?

A-ရိုးရိုး Viral Conjunctivitis ကတော့ စိတ်ပူစရာမရှိပေမဲ့ အခြားအခြားသော အကြောင်းတွေဆိုရင်တော့ သတိထားရမှာတွေတော့ ရှိပါတယ်။ အဓိကကတော့ ကိုယ့်အနီးအနားမှာ မျက်စိနာတဲ့သူရှိနေရင် ကိုယ့်လက်နဲ့မျက်စိကိုမထိဖို့ဘဲ။ သူ့မျက်စိကနေ သူ့လက်၊ သူ့လက်ကနေအခြားလူကိုကူးနိုင်တော့ ကာယကံရှင်က လက်ကိုခဏခဏဆေးဖို့လိုပါတယ်။ ဒါ့ကြောင့် လက်ဆေးတဲ့ကိစ္စက အဓိကပါပဲ။ရာသီဥတုရဲ့အပူဒဏ်က သိပ်များရင်ကျန်းမာတဲ့သူဖြစ်ပစေ ကိုယ်ခံအားက ကျသွားတတ်ပါတယ်။ ဒါ့ကြောင့်အပူဒဏ်ကို ကာကွယ်တဲ့နေထိုင်တာတွေလည်း လုပ်သင့်တယ်။ ဒီလိုအချိန်တွေမှာဆိုရင် ရောဂါကအရမ်းကူးလွယ်လို့ သတိထားရပါမယ်။

Q-ဖြည့်စွက်ပြောစရာရှိရင်လည်း ပြောပေးစေလိုပါတယ်?

A-အဓိကကတော့ ကိုယ့်အနီးအနားပတ်ဝန်းကျင်မှာ မျက်စိနာတယ်ဆိုရင် ဒါအဖြစ်များတဲ့ ကာလလို့ပဲ သတ်မှတ်ရမှာပေါ့။ ကိုယ့်အနီးအနားမှာ မျက်စိနာတယ် ဆိုတာ တော်တော်များများဖြစ်လို့သာ နာတာလေ။ အကုန်လုံးမှာ ကာကွယ်ရေးက အဓိကပဲဖြစ်တော့ လက်ဆေးမယ့်ကိစ္စတွေကိုပဲ အဓိကပြောချင်ပါတယ်။နောက်တစ်ခုက လူနာတွေကိုအဓိကနားလည်အောင်ပြောရတာက မျက်စိနာဖြစ်ရင် သူသူကိုယ်ကိုယ် ချက်ချင်းကောင်းချင်တယ်။ အဲဒီတော့အရမ်းမျှော်လင့်ကြပါတယ်။ဆေးခန်းတစ်ခု၊ ဆေးရုံတစ်ခုကိုသွားပြရင် သူတို့က ပုံမှန်ဆေးထည့်လိုက်ရင် တစ်ရက်၊ နှစ်ရက်ဆို ကောင်းမယ်လို့ထင်ကြတယ်။ သူတို့ကြိုပြီးတော့ မျှော်လင့်တဲ့ ကိစ္စတွေကိုကျွန်မတို့က သူရဲ့သဘာဝအတိုင်းမျှော်လင့်ဖို့ သတိပေးရတယ်။ဒါမျိုးက နှစ်ပတ်(သို့မဟုတ်)သုံးပတ်အထိကြာတတ်တယ်။ မျက်ကြည်လွှာမထိရင် အမြင်ကတော့မဝါးဘူး။ တကယ်လို့များ အမြင်ဝါးလာတယ်၊ နေရောင်စူးလာတယ်ဆိုရင်လည်း သက်ဆိုင်ရာမျက်စိဆရာဝန်ကြီးတွေဆီမှာ ပြသဖို့ လိုပါတယ်။နောက်တစ်ခုက မျက်စိအရမ်းနာရင် မျက်လုံးအတွင်းက သွေးကြောတွေရောင်ပြီး မျက်ရည်တွေက သွေးရည်ကြည်လိုမျိုး မျက်ရည်တွေကျတတ်ပါတယ်။ သွေးရောင်လေးတွေ ထွက်တတ်တယ်။ ဒါကို လူတွေက အရမ်းကြောက်တတ်ပါတယ်။ ဒါလည်း အမြင်အားကောင်းနေရင် အရမ်းကြီးမစိုးရိမ်ရပါဘူး။ နောက်တစ်ခုမှာ ချင်တာက မျက်စိနဲ့ပတ်သက်တဲ့ဆေးတွေဆိုရင် ကိုယ်ဘာသာကိုယ် မဝယ်ဘဲ ဆရာဝန်တွေရဲ့ အကြံပြုချက်နဲ့သာ ဝယ်သင့်၊သုံးသင့်ပါတယ်။

==========

The Myanmar Times :https://myanmar.mmtimes.com/news/122939.html